無黨籍臺北市長參選人黃珊珊今仔日發表伊的長照政見，強調重陽敬老金未來一定會繼續發。國民黨參選人蔣萬安是公佈伊的競選官網佮募款物仔，嘛呼籲民進黨參選人陳時中，愛針對賴清德講臺北市是疫情的開端，講清楚伊的立場。陳時中回應，伊絕對無歧視臺北，疫情會煏是對中國武漢來的。
佮序大人仝齊唱情歌，無黨籍臺北市長參選人黃珊珊初三來到艋舺的愛愛院日照中心，發表伊的長照政見，希望擴大臺北敬老卡使用範圍，嘛強調無論未來啥人當選，重陽敬老金一定會繼續發。
仝一个時間，國民黨參選人蔣萬安推出伊的競選官網佮募款物仔，其中的揹仔是回收過去競選布條做的，實踐伊的環保理念。另外針對副總統賴清德初一講「臺北市是疫情的開始」，蔣萬安是呼籲民進黨參選人陳時中愛講清楚伊的立場。
國民黨臺北市長參選人蔣萬安表示：「所以請陳時中部長，真明確直接表態，你到底敢有認同賴清德副總統的講法，莫驚得失你較早的頂司。」
初三陳時中參訪兒童體能學院時閣一擺表示，伊絕對無歧視臺北，疫情的開始是佇武漢。
民進黨臺北市長參選人陳時中表示：「我猶是愛強調，規个疫情開始就是佇咧武漢，所以咱會號做武漢病毒，未來確實是按怎，閣愛依賴國際的調查。」
無黨籍臺北市長參選人黃珊珊表示：「我聽講伊閣欲去研究講是毋是臺北，原因是啥物，伊欲去研究，按呢就等伊研究煞才來做市長。」
黃珊珊表示，臺北市民是受害者，賴清德誤會了後，應該愛對臺北市民有淡薄仔表示才著。
