呈現人生困境 舞團欲替觀眾說出憂愁的心聲

若欲用肢體表達人的情緒，應該是啥款？來自台南的稻草人舞團今年推出新的作品「七體 FIGURE 7」，用看圖講故事的方式，共人對現實生活當中的齷齪、鬱卒表達出來。

稻草人現代舞團藝術總監 羅文瑾表示：「佇觀看舞蹈的過程中，逐家可能會當對應著家己的性命，可能悲傷，或者是拄著一些困境。舞蹈確實是一種抽象的語言，但是阮佇過程中，會共比較生活化的動作和場景，囥佇阮的作品內面，會希望予觀眾看著性命佮舞作的連結」

為著予舞蹈表演閣較倚近人心，稻草人舞團邀請台灣古樂𥰔仔的演奏家林靖偉，替這部作品來譜曲，用幼路的𥰔仔聲來表現情緒

古微琉樂古樂團音樂總監 林靖偉講：「𥰔仔的聲音，佇演奏的時陣，會感覺伊足成小學生歕的聲音，但是伊其實有真濟無仝款的聲，因為伊是插電的，所以真簡單就共遮幼路的物件提出來」

後疫情時代，藝術家用舞蹈作品表達人類心中的煩惱佮驚惶，「七體 FIGURE 7」十月初七到初九會佇台中國家歌劇院的小劇場佮逐家見面，十月廿一到廿三，嘛會佇國家兩廳院實驗劇場發表。