講"無親像某乜中華大學夜間部" 高虹安會失禮

針對民眾黨高虹安20開記者會，煞出現看輕中華大學夜間部的言論，國民黨佮民進黨市長參選人，表示多元的社會每一个人攏應該受著尊重，用讀佗一間學校來相比並（sann-pí-phīng），實在無適當。

國民黨新竹市長參選人 林耕仁：「伊會使批評抑是質疑個人，毋過用學校來比較，非常無適當。」

民進黨新竹市長參選人 沈慧虹：「學歷毋是欲提來歧視別人，上重要的是，教育應該是予逐家去學習面對問題、面對事件，予家己閣較好。」

高虹安21透早透過網路表示，家己的言論造成逐家的無爽快，欲向中華大學道歉。

民眾黨新竹市長參選人 高虹安：「我用詞無精確，予中華大學老師參學生感覺有無爽快，我再一次誠心誠意來道歉，我嘛會虛心檢討改進，多謝逐家的建議，真失禮。」

中華大學學生會表示，雖然高虹安已經道歉，毋過伊的言論確實引起學生不滿， 原本10月欲邀請高虹安來學校演講，目前愛閣再討論。

中華大學學生會長 張誠恩：「這件代誌阮會用特別的案件，來佮學生會幹部研擬，嘛參學校長官做討論。」

隨投票日愈來愈徛近，高虹安這改的失言風波，對目前新竹市長選舉三跤㧣的局勢，會產生啥物影響，各陣營攏閣咧觀察。