跨國同志拍官司才通結婚 民團籲內政部先函釋

雖然臺灣允准同性婚姻,毋過若同性情伴,其中一个的國家毋准同性婚姻,就無法度佇臺灣登記。目前已經有4對情伴是外國人的,透過行政訴訟拍贏官司。同志權益團體今仔日召開記者會,呼籲內政部先用函釋方式,予這寡有外國情伴的有情人會當登記結婚。

台日跨國伴侶 Amber:「對未來,阮猶是感覺真未知,感覺真無助。」

跨國伴侶Amber佮Tomo已經做伙6年,因為日本法律無允准同性婚姻,致使in嘛無法度佇台灣結婚。民間團體表示,in知影的台日同性伴侶就有21對,因為按呢無法度結婚,in需要透過各種方式,才會使佮家己的伴侶做陣生活。

台日跨國伴侶 Amber:「三年前,阮決定用成立公司的方式來提著工作的簽證,因為疫情阮的生理受著真大的影響,所以續簽方面,阮感覺著真大的壓力。」

跨國台日群組組長 Andrew:「有人因為疫情、簽證等等原因,予強迫分開,到今無法度見面。講著我,我頂擺佮我的伴侶見面,已經是九百外工進前。」

台日同性伴侶有吉英三郎佮阿樹,進前嘛予戶政機關拒絕登記,in行行政訴訟,7月21台北高等行政法院判in勝訴。法院認為日本無允准同性婚姻,是違反台灣公序良俗,判定無應該適用日本法律。同志權益團體呼籲內政部,佇完成相關法律修改進前,先透過函釋,予判決的要旨適用全體的跨國同性伴侶。

台灣伴侶權益推動聯盟秘書長 簡至潔:「這已經是累積第四个判決,無任何一對跨國同性伴侶,予咱的法院拒絕結婚。有吉先生若是會使按照涉外民事法律適用法第八條,排除適用日本法律,在座所有的台日伴侶為啥袂使結婚。」

內政部回應,猶是欲以修法為主,無按算透過函釋的方式處理,in表示司法院推出的修法草案,目前進度咧行政院。但是這个草案是舊年正月送到行政院,到今超過年半猶無進度。

全台敬老金大調查

相關新聞