舊衫回收量強欲8萬噸有35%燒掉誠拍損

洪敏真莊沛文/台北報導發布時間：2022-07-26 19:15 更新時間：2022-07-26 20:03

根據環保署統計，舊衫回收量逐年攏增加，到2020年已經有7.8萬噸，毋過扣掉會當做二手衫的，猶有35%予人當作糞掃燒掉，為著鼓勵循環再利用，有民間團體舉辦中古義賣已經辦八年矣。希望募著一千件二手皮包、衫褲，協助怹照顧孤單老人。

對皮包、鞋仔到囡仔衫，應盡攏有，民眾的愛心經過整理，二手的物仔也通變黃金，弘道老人福利基金會今年第八年辦精品義賣，對這馬開始到八月中，欲收集八九成新的衫和皮包，希望募著60萬，做照顧孤單老人的資金。
弘道老人福利基金會臺北服務處處長鐘智馨表示：「阮舊年大概落四成左右，主要是因為疫情的影響，大多數寄來的衫褲攏會先焦洗過，免煩惱其實會使做伙行出來買。」
其實舊衫回收量，這幾年因為環保意識提升，收的量逐年增加，不過真正會當提來做二手衫的煞真少。若看數字，最近五年來，環保署的舊衫回收量，2016年4.8萬噸，到2020年有7.8萬噸，不過真正會當成做二手衫的比例逐年落，2020年扣掉抾去做破布，落尾猶有35%做糞掃燒掉。民間團體希望透過義賣，予舊物循環再利用。
二手精品義賣會響應大使詹子晴表示：「進前的一寡衫，可能對你來講無合穿矣，所以愛讓予閣較需要的人，希望逐家鬥陣動手替衫仔櫥減肥。」
陳麗卿形象管理學院執行長林佳宜指出：「感性的毋甘，其實這衫你囥佇衫仔櫥內面，不如共伊做成相片，可能用一个較媠的相框共伊框起來，你會當囥佇身軀邊，你逐工就會當看著」
就驚疫情影響捐贈意願，民間團體表示物資志工攏會做整理，不過建議欲捐進前盡量愛焦洗，降低傳染風險，目標是募著一千件愛心，替無依無倚的老人，盡一份心力。