6個月到5歲開始注莫德納 病院診所現人陣

幼囝的哭聲一聲換一聲，國內開始注6個月至5歲的幼兒莫德納疫苗，2歲以下注跤腿，以上注手股，有袂少家長tshuā囡仔來注。

家長表示，「希望就是伊注過了後，通予伊出去活動。因為這馬就是學校也毋敢去，餐廳、戶外攏毋敢去。」「猶是會煩惱副作用，但是應該猶是保護力大過副作用。因為伊進前拍疫苗狀況攏猶袂䆀，就無遐煩惱彼一塊。」

幼兒莫德納疫苗開注，台北市衛生局表示，頭批的預約平台就有4千7百外人預約，除了診所、病院特別門診，月底開始也會佇12个行政區設注射站，聯合病院醫師也表示，注疫苗除了預防感染也通降低腦炎、MIS-C等病尾的發生率。

北聯醫和平婦幼院區小兒科主任 方麗容表示，「目前遮爾細的幼囝是無心肌炎的報告，有時陣你看脾土無好、較愛睏，遮的攏是家長愛特別注意的。」

疫情指揮中心指揮官 王必勝表示，「咱累積的108个重症幼囡仔佮兒童的重症，其中有63%是0至5歲。至於相關鼓勵措施會看注射狀況閣再研議。」

另外有醫師講，注預防射會使降低三成有症狀感染的比率，一般輕微抑是暫時的副作用大概兩至三工，發燒的比率大約廿幾葩，家長毋免傷過煩惱，若最近拄好欲注常規的預防射，也無需要閬時間。