臺北文學館籌備處成立 望保存愈濟臺北文史

畫面來源:台北市文化局
佇真濟文學家佮文訊雜誌社的推動之下,臺北文學館籌備處今仔日正式成立。in向望臺北文學館,會使保存臺北文學的歷史資料,嘛會當予世界看著臺灣的文學。

佇濟濟文學家佮台北市政府團隊的見證之下,台北文學館籌備處正式掛牌成立。作家向陽表示,台北文學館的成立,會使予世界看著台灣文學的珍貴。

作家 向陽表示:「伊會是台北成做一个國際化城市,代表台灣的文學佮台北文學,一个重要的基地,猶閣有展示的場所」

台灣真濟文學作品攏咧描寫台北人的生活,記錄台北這个城市的變化。短篇小說《台北人》的作者白先勇嘛特別透過影片,表達伊對台北文學館的期待佮向望。

作家 白先勇表示:「台北文學館成立了後,希望成做台北市的一个文化地標,阮大家對台北市的文學館,非常期待、非常關心,阮希望這个文學館會使較緊成立」

文訊雜誌社長封德屏為著台北文學館的設立走傱幾若冬,嘛邀請超過百名的文學家、教授來討論台北文學館未來的模樣。

文訊雜誌社社長 封德屏表示:「阮嘛佇這个所在,舉辦十場五工的百人文化論壇"城事提案",這一百位文化人的提案,攏非常認真對待,台北需要這个文學館這个代誌」

現場有真濟磚仔,頂懸是每一個文學家的簽名。籌備只是開始,閣愛真濟人鬥陣疊磚仔,這个台北文學的厝才有法度落成。

全台敬老金大調查

相關新聞