高雄港埠旅運中心8月完工 欲唌郵輪.遊客來臺
陳嘉筠 賴威佐 / 高雄報導
發布時間：
更新時間：
已經起欲十冬的高雄港埠旅運中心，今年八月就欲完工矣，毋過台灣當時才會開放郵輪入來？交通部長王國材表示，郵輪佮邊境仝時間開放，希望開放了後，來台灣的郵輪的數量，會比疫情進前的六百隻閣較濟。
高雄港埠旅運中心，造形特殊的建築物已經成做港邊的新地標，3D曲面的帷幕也增加施工的困難。經過十年，總算欲佇今年八月完工，分批開放。
高雄港務公司高雄分公司總經理 王錦榮表示，「遐閣有施工架猶未拆，七月會拆掉，八月會全部完工。然後教保中心到時陣八月會交付營運。」
初五交通部長王國材視察旅運中心的進度，伊認為疫情過後，目前全世界國境開放，旅運中心完工的時機真好，希望發揮郵輪母港的功能，只不過台灣國境當時欲全面開放，猶是愛看指揮中心的決定。
交通部長 王國材表示，「郵輪開放佮國境開放仝步，等指揮中心疫情的判斷。過去疫情進前有六百隻郵輪，希望當時估算是往七百、八百隻，就看疫情發展，希望比疫情前較懸較濟。」
高雄旅運中心有15層樓懸、地下2層，會使停靠22萬噸的大型郵輪，毋但提供旅客出入，嘛有免稅商店佮餐廳。港務公司表示，已經有郵輪業者來接接，希望明年初就會當啟航。
