各地開始注射BNT兒童疫苗，真濟家長搶欲替囡仔預約排隊，屏東5/27開始，佇屏東火車站設注射站，毋免預約，人隨到隨注，想袂到天猶未光就有人來排隊，甚至有對台北落來的民眾，專工𤆬囡仔來注射。
屏東車頭透早就出現遮爾濟家長tshuā囡仔來排隊，因為這个大型注射站提供囡仔的BNT疫苗，毋免預約，隨到隨注，毋過猶是有人驚注袂著，半瞑就來排隊。
民眾 林先生表示，「搶頭香無搶袂著，真麻煩。四點五十左右就來。」
民眾 施小姐表示，「昨昏走幾若間病院診所攏排無，所以今仔日透早就來排。」
現場排隊的至少兩三百人，有家長規氣叫囡仔共課本紮咧，那排隊那線頂上課，大人囡仔攏辛苦。另外嘛有袂少對高雄來，甚至有人是對新北tshuā兩个囡仔來屏東注射BNT疫苗。
新北家長表示，「新北大部份攏敲過攏滿矣，算是出差就規家伙仔tshuā落南。」
民眾 朱先生表示，「建議各縣市會使效法屏東隨到隨注較方便，預約電話定定袂通，診所也無閒，電話敲一輪攏注無。」
屏東車頭是相連紲三工開囡仔BNT的注射站，早起除了有一个囡仔注射了人無爽快送醫，五百个名額真緊就注了矣。
屏東縣衛生局疾管科代理科長 仇幼娟表示，「注射量會看現場人數佮病院量能，機動性調整。未來也會依中央疫苗撥配的情形，評估敢閣會開注射站。」
衛生局表示，屏東的學校對三十開始嘛會安排注BNT疫苗，家長毋免傷過著急。
