鵝肉店脫箠開9百萬發票 過2個月總算揣著人客

嘉義番路有一間賣鵝肉的餐廳,佇228連假的時陣,因為無細膩共發票的金額揤毋著,開一張九百萬的發票出去,店家收擔了後發現,趕緊佇網路頂懸揣人客,經過2個外月的時間,這馬已經揣著矣。

店家咧無閒款料,準備開店。這間佇嘉義縣番路鄉的鵝肉店,228假期的時陣,無細膩開一張九百萬的發票出去,經過2個外月,人客發見了後,連鞭通知店家,閣用掛號寄轉來。

業主 葉小姐表示,「人嘛共阮通知講,阮有開毋著去,無阮共講有矣。伊是講就隨共你寄轉來就著矣。人隔轉工就寄轉來予阮矣。」

針對店家發票金額開毋著的問題,國稅局表示,如果發票提袂轉來,店家只要主動向國稅局申請報備,佇當期申報營業稅的時陣,寫正確的金額就會使,彼張發票欲對獎嘛袂受影響。

財政部南區國稅局嘉義縣分局長 黃福隆表示,「消費者猶原是會當對獎,如果有對著獎,袂去影響著統一發票著獎領獎金的權益。」

因為無張持揤毋著金額,才開出九百萬的發票,雖然後來無造成損失,毋過店家猶是表示,對方是好人,誠感謝伊閣專工共發票寄轉來。國稅局嘛強調,店家如果有相關的問題,國稅局攏會當來提供協助。
 

相關新聞

專題|全台敬老金大調查