有學生去墾丁台灣祭 高科大4/10前網路上課

墾丁台灣祭因為有確診者參加,紲後的活動臨時喝停,嘛因為有真濟大學生在場,高雄屏東就有5間大學隨改線頂教學。其中高雄科技大學是4/6公佈,4/10進前全校改線頂教學。義守大學要求有參加台灣祭的老師佮學生,攏愛自主健康管理,暫且莫來學校。

初六因為校慶補歇一工,高雄科技大學校園冷冷清清攏無人,毋過學校早起宣佈,初七到初十全校改線頂上課,是因為進前墾丁台灣祭有確診者參加,高雄科技大學雖罔無人確診,學校先採取預防指施。

國立高雄科技大學主祕 陳銘志:「台灣祭佇墾丁舉行,屏東四間大學佮阮高雄科技大學,因為阮的距離較近,學生參與難免。所以希望透過這个預防性措施,採取線頂授課方式,減少師生染著病的風險。」

毋但改線頂上課,教職人員分流上班,門口嘛公告暫停校外人士入去運動,學生早起攏收著通知。

國立高雄科技大學學生:「因為北部學生嘛會轉來南部上課,南部嘛有疫情,想講改按呢嘛較好。」

另外義守大學是決定,有去參加台灣祭的老師佮學生攏愛自主健康管理到初十,這段期間線頂上課,無症狀十一才會當轉去學校,其實因為台灣祭活動有人確診,疫情緊張,屏東已經有四間大學臨時改線頂教學到初十,高屏的大學攏無希望連假了後,疫情閣翻頭。

相關新聞

專題|全台敬老金大調查