清明食潤餅 民眾三更暝半排隊搶買潤餅皮

有一寡所在的風俗,佇清明愛食潤餅,這陣潤餅皮、潤餅kauh的生理上好。屏東有一間做潤餅皮的店,半暝就開始賣,另外一間賣潤餅kauh的,民眾愛排隊排三點鐘才買會著,雖罔潤餅皮的價數有起,清明一年才一改,逐家猶是會買。

屏東市北區市場,透早就遮爾濟人咧排隊,初五清明這工,逐家攏是來買潤餅皮。

潤餅皮業者表示:「本來一斤愛拭大約五分鐘到十分鐘,今仔日拭一斤可能愛二三十分鐘,(因為)手無力矣」

這間潤餅皮的店,半暝一點外就開始賣,店內加開十爐,透暗趕緊做潤餅皮,比平常加幾十倍的量,民眾猶是愛排隊。屏東另外一間賣潤餅kauh的店,排隊的民眾排到街路踅一輾,若想欲買至少攏愛排三點鐘。

民眾表示:「我來到這馬拄好三點鐘,排三點鐘,五六點就來排隊喔,五點五十排的,這馬八點五十」

為著清明,業者增加十外个員工,半暝兩點營業,邊仔幾个大鼎攏無閒咧攢料,猶是袂赴做潤餅kauh。清明拄好四工連假,高雄這間潤餅kauh的老店,生理嘛真好,in透早四點就發號碼牌,無提著號碼牌的,為著應景欲食一个潤餅kauh,嘛是愛佇現場排隊等。

相關新聞

專題|全台敬老金大調查