大稻埕老厝"合勝堂" 保存修復費用懸.難度懸

台北大稻埕有一間裝潢艷麗的老厝叫「合勝堂」,到這當時已經起超過120年,平常時提供劇組拍片較濟,不過老厝欲修復愛開真濟錢,產權問題也僫處理。有專家建議,由官方設立平台,提供法規佮經費相關的協助。

柴做的門面,古色的裝潢,經過的民眾攏會好奇探頭看,台北大稻埕街區的人家厝「合勝堂」,起佇1895年,平常時只有做私人用途、無開放參觀,因為裝潢華美、真濟骨董,有咧租予劇組做拍片等等使用。

合勝堂主理人李興順表示這間厝是阮爸爸佇1951年,佇這个所在開店,當時來的時陣是共人租的,租了大概六七年,厝頭家就賣予阮爸爸,頭尾差不多修六年外,六年外干焦維修建築費用三千幾萬。

修復老厝除了真開錢,老厝傳過幾若代、產權複雜。而且若欲修復,嘛可能揣無專門的建築師,抑是佇法規的部份卡關。

建築師呂大吉指出有一寡建築技術規則、消防、無障礙這等等攏愛注意,但是這是文資法攏會使去排除,這个時間申請的時間會較長。

台北市文化局文化資產科科長賴郁雯表示產權的部份,因為這屬於私權,文化局就真正無法度提供幫助,但是若是經費,譬如像文化局、甚至是中央,其實攏會使提供補助。

修復老厝開錢、閣開時間,一般民眾真僫負擔。呂大吉認為,若是有一个官方平台,由官方提供法規佮經費的幫助,媒合民間的老厝、佮有興趣的團隊合作修復經營,才有機會解決問題。

 

相關新聞

專題|全台敬老金大調查