高雄旗津篩檢站今仔日增加到五個據點，篩檢範圍對本底的6千人掠闊到2萬人。另外佇高雄，地區級以上的病院攏愛設戶外呼吸道門診，醫生共病人看煞，就愛隨做快篩。基層的診所，是提供予病人居家快篩試劑，篩檢的結果愛通報予診所。
小港病院的醫護人員，佇戶外專區替民眾檢疫問診，若是來到診所，排隊民眾嘛袂少，醫生仝款佇戶外看病，民眾欲掛號、提藥仔，攏有人鬥相共，高雄市府宣佈，擴大篩檢，有呼吸道症頭的民眾若是來診所看病了後，就會免費發居家快篩劑予民眾轉去厝內家己篩檢。
民眾：「為著逐家安全健康，我感覺有需要。」
民眾：「你就毋免佇遐爾濟人的所在，暴露佇危險之中，厝內較安全。」
毋過戶外看病品質無好，醫生嘛煩惱民眾家己快篩敢會準確，民眾敢真正會回報結果。
耳鼻喉科診所副院長曾哲凰：「到底敢是這个人快篩的結果，伊提予阮、甚至時間過偌久，這嘛攏是真重要因素。」
另外，市府嘛佇旗津區增加社區篩檢站，佇旗津病院、福壽宮等五个所在，透早就有民眾佮附近港區工作人員來排隊，當地里長四界敲電話叫人趕緊來快篩。
旗津民眾：「報旗津有人著，來用用的較安心。」
高雄目前疫情集中佇港區，到24下晡三點已經篩檢1萬八千多人，希望莫出現第三波的社區感染。