體育運動精英獎頒獎 翁明輝得著終身成就獎

對副總統賴清德的手、共體育運動精英終身成就獎的獎盃接落來，木球之父翁明輝的太太和後生代替佇天頂的翁明輝領獎。

翁明輝的太太 翁歐秦清：「今仔日欲來領獎，我有共伊講我欲代替你領獎，伊應當嘛真歡喜」。

翁明輝的長子 翁啟祥：「期待相關部門會當持續支持肯定木球，將國人自行研創的運動項目，推向閣較好的發展境界」。

翁明輝佇今年二月份因為大腸癌過身，享壽77歲，翁明輝1990年發明木球運動，1994年開始佇國際推廣，這陣國際木球總會已經有54 个會員國，30外冬來的推展，也予木球佇全大運、全中運成做比賽項目。抑若特別獎頒予桌球教父莊智淵，不過莊智淵因為當咧外國比賽，由徒弟領獎。

今年的得獎人主要攏是東京奧運的選手，包括最佳女運動員獎攑石輪選手郭婞淳、伊也拄結束世錦賽，替台灣提著金牌隔離中。最佳男運動員柔道選手楊勇緯、最佳新秀運動員許樂，伊佇田徑100公尺跨欄出擢表現，也成做亞洲U18和世界聽障紀錄保持人。

最佳新秀運動員獎得獎人田徑選手 許樂：「就算阮是身心障礙者，只要堅持落去，莫自暴自棄，阮一定會當看著未來的路」。

最佳男運動員獎得獎人柔道選手 楊勇緯：「夢想袂干焦是夢，是會當達成的」。

最佳運動精神獎頒予高爾夫gâu人潘政琮、最佳運動團隊獎盃頒予羽球男雙冠軍組合李洋、王麒麟、in的教練陳宏麟也提著今年最佳教練獎。