歌仔戲敆新型歌舞 臺語台"孟婆客棧"禮拜放送

人講創新愛有傳統的底蒂,才有通開枝散葉。為著予歌仔戲新的性命,唐美雲歌仔戲團用欲四年的時間,用電影手路加入濟濟歌舞元素,打造歌仔戲喜劇「孟婆客棧」,這禮拜日暗時八點就佇公視台語台首播。

《孟婆客棧》前導片段「我欲為你,梳妝點胭脂。」

佇冥界,梁山伯和祝英台,延續𪜶淒美、割心槽的愛情。少年演員施易男和李千那,頭擺佇電視頂搬歌仔戲,就搬了真出角。

《孟婆客棧》前導片段「來喔,來喔。逐家緊來啉湯喔,通好去投胎轉世囉。」

歌仔戲國寶王金櫻和小咪老師演孟婆,這齣《孟婆客棧》,以歌仔戲為主體、打造新型態的歌舞情境喜劇,改編唐美雲歌仔戲團2018年仝名舞台劇作品,欲表達人總是佇失去以後,才知珍惜,希望成做台語音樂劇的起頭。

《孟婆客棧》製作人,唐美雲表示:「予少年人會當因為這齣戲,來行入來歌仔戲的世界,歌仔戲毋是𪜶印象當中,干焦陪阿公阿媽看的彼種爾爾。」

《孟婆客棧》導演,吳定謙表示:「咱台語,咱語言是足媠的,歌嘛足好聽的,所以我是想講孟婆客棧,會當予逐家看著台灣戲劇的可能性。」

用咧欲四年的時間製作,劇組陣容大大。有歌仔戲國寶、演藝界濟濟前輩,也有金曲歌王許富凱。

臺語金曲歌王,許富凱表示:「其實文言佮咱平常時講的台語,是完全無仝款的,有時仔愛感謝阮媽媽,伊會當佮我練台語。」

《孟婆客棧》演員,李千那表示:「希望少年人會當綴阮的跤步融入阮的世界我感覺這是一个創新的歌仔戲。」

《孟婆客棧》10月17禮拜佇公視台語台暗時八點首播,招觀眾朋友透過電視,聽台語、看歌仔戲按怎佇傳統的底蒂,開枝散葉、行出新生路。

全台敬老金大調查

相關新聞