總統:兩岸愛平等對話 臺灣主權絕對袂退讓

10/10雙十大會,總統蔡英文發表演說,強調講若欲解決兩岸意見無仝的問題,著愛透過平等對話,也表達台灣主權絕對袂退讓的立場。而且總統嘛共在野黨喊聲,著愛堅持自由民主的憲政體制佮台灣的主權,抑閣有台灣的前途,著愛照全體台灣人民的意志來行。

CH-47運輸直升機吊掛歷屆雙十典禮上大面的國旗,飛過天頂,開始今年的雙十典禮,今年的雙十典禮以「民主大聯盟,世界加好友」為主題,展現台灣加入國際社會的決心。

總統蔡英文表示:「舊年阮送出去的喙罨,是Taiwan can help,今年𪜶送來疫苗,是友情的疫苗,這就是善的循環,我欲佇遮向國際社會承諾,台灣一定會佇國際社會中,做出貢獻。」

毋過紲落來,講著來自中國的威脅,總統蔡英文強調,若欲解決兩岸意見無仝的問題,需要平等的對話。

總統蔡英文表示:「阮善意無變,承諾無變,維持現狀就是阮的主張,阮嘛會全力阻擋現狀予人改變。」

蔡英文嘛呼籲參加典禮的國民黨、民眾黨、時代力量三个在野黨主席朱立倫、柯文哲、陳椒華,政黨政治有競爭,毋過若牽涉國家尊嚴佮人民未來,就需要團結,約束四个堅持。

總統 蔡英文表示:「永遠愛堅持民主自由的憲政體制,堅持中華民國佮中華人民共和國,互相無隸屬,堅持主權袂使受侵犯 併吞,堅持中華民國台灣的前途,需要遵循全體台灣人民的意志。」

奧運、帕運選手組的車隊駛過總統府頭前,過去一年內底,保護台灣的軍警消醫護人員等等,嘛來和逐家見面,接受民眾的感謝。

民眾表示:「足歡喜的。」另外一个民眾講:「我感覺佮舊年比,應該是差不多,參加的人敢若有較濟。」

雷虎戰機飛過總統府的天頂,為今年的雙十大會做一个結尾,雖罔講今年因為疫情,猶是有淡薄仔限制,毋過現場的民眾猶是真熱情,做伙慶祝中華民國生日快樂。
 

九合一選戰解析

相關新聞