高雄愛河佇市區這段，相連紲四工水攏變色，範圍有幾若公里，民眾懷疑有汙染，毋過環保局到現場檢測水質，表示是水內底有真濟草蔬咧生湠，變色是自然現象，市民毋免煩惱。
徛佇愛河之心橋頂對下跤看落去，規个水面變甲赤赤，若親像鐵鉎。定定來愛河岸邊騎車、散步的民眾攏有發現。
民眾表示：「正常有時陣是藍色，有時較土色，是有感覺奇怪，毋過𪜶有咧清。」
「水就看來垃圾款，你佇遮運動的人，看著水垃圾款，有污染的感覺，你當然無爽快。」
其實愛河的水變色已經有四工，範圍對龍華橋到願景橋這段，超過兩公里，敢是河水汙染？環保局人員巡查嘛有發見。現場檢測水質，發現溶氧量佮酸鹼度攏真懸，用顯微鏡觀察，原來水中有一種叫隱藻的藻類生湠，水才會變色，佮進前的天氣有關係。
環保局檢驗科長，劉惠雲表示：「頂流部份因為間歇性落雨，造成非點源營養源排入，加上日頭足炎，閣有愛河部份河段水流慢。」
環保局表示，水中藻類生湠致使愛河變色，佇季節交換時定定會出現，舊年嘛有，是自然現象，而且愛河的水質逐年攏有咧改善。