高雄閬20冬閣辦雙十煙火 開放2萬人.愛先預約

優美的交響樂，配合七彩煙火，2021年雙十節煙火佇高雄港邊舉辦，這嘛是二十冬後，閣一擺辦佇高雄。

高雄市府23公布今年雙十節煙火的動畫，這擺放煙火範圍有3公里，出動七隻平台船，對高雄港到旗津攏有煙火通看，毋過嘛是煩惱看煙火的人傷濟，為著防疫，市府決定分流，而且只有2萬人會當預約著獎。

高雄市政府副祕書長，郭添貴表示：「二十三公頃若是以戶外防疫，每人一平方公尺，至少會當容納二十三萬人，專家會議建議降載至十分之一以下，防疫標準的十分之一以下，對二十三萬外人 變成兩萬人。」

十月初才提著振興五倍券，紲落來就是雙十連假，市府向望民眾來高雄看煙火順紲消費，只不過有議員煩惱數位縛定才送一千箍高雄券的作法，恐驚真濟小店頭無法度受惠。

高雄市長，陳其邁表示：「阮有實體券，嘛有數位綁定，阮會分配伊的比例，尤其佇實體券，阮攏有做過統計，佗一个是受困產業。」

雖然高雄市府希望雙十節煙火帶動觀光，陳其邁表示，若是國內疫情佇這兩禮拜有變化，市府嘛已經做好上䆀的按算，就是停辦煙火，一切愛以防疫為優先。