何春木百年生日忌 "黨外的檜木"放送說政治路
郭柏均 張育睿 / 臺北報導
發布時間：
更新時間：
民進黨的前輩-何春木，佇1980年，監察委員增額選舉的時，無欲接受用一千萬烏西。顛倒幫助尤清，成做頭一位黨外的監察委員。何春木的故事這馬予人翕做紀錄片，按算佇10月的時陣，會配合展覽放送。
畫面內底，是1980年當選監察委員的尤清，佮另外五个共關鍵票頓予尤清的省議員。彼當陣有人欲用1000萬共其中的何春木買票，但是何春木無接受。
何春木文教基金會董事長，何敏誠表示：「何春木伊家己選，就是推動民主自由，伊家己無選，就是幫贊民主自由制度的推行，會當對後輩民主自由的啟發，就是民主自由毋是天頂落落來的。」
何春木1922年出世佇台中，原本是記者，1950年從政，投入台灣第一擺的民主選舉，當選台中市議員，落尾嘛擔任過省議員、總統府國策顧問等等。這馬伊的故事，予人翕做紀錄片，號做「黨外的檜木-何春木」。
歷史學家，李筱峰表示：「1960年代，雷震結合彼當陣咱台灣的菁英，欲準備組黨，彼當陣的黨名叫中國民主黨，咱何春木彼當陣猶閣少年囡仔，伊就參加矣，黨外運動伊當然嘛參與，黨外運動了入去民主進步黨，伊嘛是參與。」
何春木佇台灣對威權體制行向民主化的過程，扮演重要角色。今年10月初3，是何春木的百年愍忌，這馬何春木文教基金會翕紀錄片，除了10月份會辦展覽，未來嘛會佮戲院合作放映，予逐家知影何春木的故事。
