臺灣新文化運動紀念館 展文協頭人興趣.眼界

臺灣新文化運動紀念館,最近展出一个特展,紹介1百年前的文化協會,佮社會上有咧走跳的人士。包含彼當時攏咧做啥物款的議量,通好了解彼當時的社會型態。

臺灣新文化運動紀念館專案規劃師,王力緯表示:「阮這改這个趣味展,基本上就是對這本,台灣人事鑑去做發想。」

日本時代台灣重要的政治文化媒體,台灣新民報社,出版的台灣人事鑑,內面紹介彼當時日本佮台灣社會的濟濟出名人。

臺灣新文化運動紀念館專案規劃師,王力緯表示:「攏會紹介𪜶的家庭背景,然後閣有伊的職業成長,上重要,其實伊內底上特殊的一點是,伊會紹介𪜶逐个人的興趣,像蔡培火佮意音樂,林獻堂可能佮意一寡漢詩、圍棋。」

新文化運動紀念館表示,配合百年文協活動,這陣先用較軟性的角度,先紹介彼的年代社會上沓沓仔出現休閒的觀念、一寡文人的興趣是啥物。

台灣新文化運動紀念館長 許美惠表示:「林獻堂是咱,會當講台灣頭一个去環遊世界的人,伊將伊看著的,攏共伊寫做遊記,才閣共伊寄轉來台灣民報發表,予逐家攏會當知影講,其實伊佇西方看著的世界,是按呢。」

展場內底,也有模擬文協成員放電影的場面,予逐家了解𪜶是按怎推廣想法、理念。嘛有互動體驗,予民眾測看覓,家己的個性佮佗一位人物較相𫝛,透過興趣進一步認捌百冬前文協時代的風雲人物。

相關新聞

專題|全台敬老金大調查