嘉義滯洪池光電廠啟用 全臺4廠1年發電8千萬度

嘉義縣溪墘滯洪池的太陽光電廠,今仔日舉辦啟用儀式。縣政府表示,目前太陽能發電系統併網的容量,佇熱天尖峰負載的時陣,已經占嘉義縣用電需求的9成。行政院副院長沈榮津是表示,年底有核四重啟的公投,希望相關單位加強宣傳綠電的成果。

行政院副院長沈榮津參嘉義縣長翁章梁,十七做陣主持溪墘滯洪池太陽光電廠的啟用儀式。沈榮津表示,年底就欲進行核四是毋是重啟的公投,希望相關單位加強宣傳綠電的的好處佮成果。

行政院副院長,沈榮津表示:「當咧熱的時,咱用電愈濟,所以咱為著按呢欲來起電廠,咱這馬,咱用太陽光電,共設落去了後,就怎樣解決,咱這个日尖峰的問題。」

17佇嘉義縣義竹鄉溪墘啟用的光電廠,是台灣目前上大的光電投資案,這个案佇嘉義縣、高雄佮彰化,攏總起4座滯洪池太陽能綠電電廠,總面積130公頃,一年會當發電8千萬度左右,減少碳排放量大約4萬噸,提供2萬外戶一年的用電量。

經濟部能源局長,游振偉表示:「咱這个2025年20GW的目標,咱陸續來共完成,這個月已經做6.8GW,後手閣有13GW,所以一地多用這个設計,是以後咱欲來發展太陽能,一个誠好的方式。」

嘉義縣長翁章梁表示,滯洪池解決淹水問題,光電是清氣的能源,利用滯洪池來做太陽能發電,一舉兩得,嘛替嘉義縣未來的發展,帶來誠好的幫助。

相關新聞

專題|全台敬老金大調查