新竹尖石鄉秀巒村走山 估1禮拜內恢復車路通行

大片的塗石對山頂不斷流落來，附近當咧上課的學生趕緊對教室走出來。

新竹縣尖石鄉13發生走山，毋但造成大量的塗石沖入去溪水內底，竹60線道路嘛因此斷節。
尖石鄉長曾國大表示：「疏散所有附近的受災戶佮住民，包括秀巒國小將近一百位師生，先做疏開，好佳哉這改是無人員傷亡」

縣長楊文科tshuā相關單位來到現場會勘，目前已經派大型機具開挖，共溪水引流出來避免繼續流去道路，按算一禮拜內完成，恢復道路正常。
 

楊文科表示：「竹60線是出入司馬庫斯重要的道路，這馬外環道已經封閉，目前會使對舊的道路通行，欲入去山區的民眾愛特別注意」

秀巒國小的學生15開始暫時先到附近的分校上課，另外附近的受災戶嘛已經揣著所在安置，目前除了溪水引流，塗石的部份差不多愛一個月的時間，才有法度清理清氣。