璨樹加速向北行 暴風圈猶佇中.東.東北部

路裡一欉大欉樹仔就按呢倒佇路中央，詳細一下看，猶閣有一隻轎車受著牽連，風颱璨樹來了真猛，過晝了後北部地區風雨漸漸變強，台北市基隆路二段往世貿的方向，路裡有一欉樹仔倒去，影響著三條車路，警消接著通報了後，隨去現場處理。

民眾潘小姐表示：「榕仔是的根真淺，是淺根性的植物，所以較會因為雨水厚，塗肉鬆鬆，榕仔就倒去矣。」

根據氣象局觀測，璨樹颱風中心行徙的速度有較緊，目前是佇台北的東北東爿，暴風圈猶共中部、東部佮東北部包牢咧，而且濟濟的所在是透風落雨，已針對北北基桃、宜蘭等9个縣市發佈大水雨特報，12透早到下晡5點，累積雨量前10名的地區，大部份集中佇新北市、台北市佮宜蘭縣，其中新北市坪林區的水利署碧湖觀測站，測著9/12累積雨量176毫米，是全台灣上濟的。

氣象局簡任技正伍婉華表示：「風颱的環流帶來的雲系，一波一波絞入來北台灣，預估到暗時仔，北台灣地區猶是會繼續落雨，有當時仔雨會較大，另外，風颱的環流順咱的山脈，嘛有一寡雲系佇山脈的所在形成，所以中南部山區也是會有陣雨。」

氣象局表示，以目前璨樹風颱的路線佮速度來預估，可能佇9/12禮拜半暝彼跤兜，本島地區就會脫離風颱的暴風圈，可能會當解除陸上風颱警報，13拜一透早會解除海上風颱警報，毋過猶是愛看實際觀測的狀況。