"璨樹"掃南臺 東琉線船幫早起10點後停駛

璨樹風颱的暴風箍仔,今仔下晡已經掃入來恆春半島,海邊仔開始起大湧,往來東港佮小琉球的東琉線,本底拜六規工停駛,毋過有業者趁透早的天氣猶未變䆀,就加開船幫,予袂少民眾趕緊坐船轉來東港,另外,嘛有農民是趕緊採收菝仔,減少損失。

滿州的海邊,海湧一波閣一波,而且愈來愈懸,璨樹風颱頂晡已經接觸恆春半島,海邊開始出現風雨,佳哉東琉線的船猶會當開,對小琉球來的船靠岸,就看著袂少民眾捾行李落船,因為風颱的關係,真濟人攏是提早轉來東港。

民眾:「有提早轉來,風颱天的關係,這是加開的船幫。」

「本底今仔日欲去浮水沬,這馬無矣。」

泰富航運經理,冀慶生表示:「本底今仔日欲停航,因為實測風力允准狀況,阮希望會當,共留佇小琉球的旅客運轉來,所以今仔日加開三个航次。」

因為頂晡海上風力2級,海湧懸度才一米半,東琉線拜六臨時加開船幫,予民眾趕緊轉來本島。另外潮州嘛有農民趁猶未落大雨,趕緊採收樹頂的菝仔。

果農 潘上至表示:「減少損失啦。因為風雨偌大毋知影,就做萬全準備。」

毋但菝仔愛趕緊採收,遮的檨仔樹栽嘛愛加強固定,莫予大風吹倒。大雨猶未來進前,縣府已經載來真濟太空包,共麟洛大排駁岸的破空補起來,頂斗風颱,溪水沖破駁岸,害附近道路佮田園攏淹水,這擺水利處有做準備,全面警戒。

九合一選戰解析

相關新聞