新竹縣有一間病院，設計出一種，會當共疫苗抽甲真清氣的台仔，一罐疫苗免5分鐘的時間，上濟會使抽出12筒，予閣較濟人通注著。
醫護人員輕跤細手對台仔頂懸抽出疫苗，因為數量有限，新竹這間病院，設計出這个會使共疫苗罐仔抽甲閣較清氣的台仔，希望每一滴的疫苗攏袂拍損去。
新竹縣大安病院院長，謝煒銘表示：「藥劑會使抽了閣較精準，嘛避免來來回回重閣抽的情形，這个台仔基本上算是阮病院的發明。」
原本1罐疫苗用1cc的射筒上濟抽11筒，這馬配合使用這个專用的台仔，會使抽甲12筒。
謝煒銘表示：「一般用手去抽，一手扲藥罐仔一手去抽，兩手攏袂穩定，會掣，這馬共藥劑囥佇台仔頂懸固定，按呢就會使用兩手，共射筒扲牢來抽，就會使抽甲閣較準。」
原本估計1000筒疫苗的量，最後佇現場注了1208人，這个抽疫苗專用的台仔，減輕醫護人員的工作量，嘛予疫苗利用甲貼底，予閣較濟人注著疫苗。