香港民主弄家散宅 畫家邀請民眾用圖留落祝福

香港的民主受著糟蹋,國家人權博物館和關心人權的畫家-林真美鬥陣合作。邀請民眾佇網路頂頭用圖共香港的祝福,連日本的畫家也來響應活動。

以顯目的黃色坐底圖,頂頭寫我支持香港的自由的英語字,也有畫佇光影中的小提琴的精靈,表達對老樹新生的希望遮分別是日本出名的插畫家荒井良二和伊勢英子,為著響應咱國家人權博物館,佇網路聲援香港活動所畫的。

兒童文學工作者 林真美講,「足樸實的物件,毋過伊就是馬上會使予人感動,就我知影的就是足濟香港的朋友,嘛攏看著矣,其實嘛攏足感謝逐家的支持。」

香港今年六月先是紙本的蘋果日報被逼停刊、8月15民陣解散、加上最近香港民主派人士相連紲去海外尋求庇護等等,學者表示香港會當講百分之九十失去自由,不過聲援的力量定著對北京有壓力。

中研院台灣史副研究員 吳叡人講,「咱這馬透過種種小小的活動,事實上咱共這馬香港咧受苦的代誌,欲講予這世間的人知,予逐家毋通袂記得這時間變化真緊,無定著一年兩年中間,世間有真大的變化,彼當陣香港的問題就有法度解決。」

用插圖聲援香港,國內也有濟濟作者是2、30歲的少年畫家,這兩年和國家人權博物館鬥陣,以畫筆畫出人權精神。

國家人權博物館副館長 張嬋娟講,「除了創作者這爿的培育,阮也希望和出版社合作,鬥陣針對人權議題的繪本出版。」

人權館表示雖罔網路串聯活動,七月底就結束不過這陣猶繼續咧湠,已經累積超過90幅圖,眾人攏望用藝術替香港留一線希望。
 

全台敬老金大調查

相關新聞