新竹城隍廟口恢復營業 業者歡喜有生理通做

新竹城隍廟口頭前的擔仔商,對5月疫情爆發的時陣,開始歇睏,這禮拜總算恢復營業。擔仔商講,兩個外月無生理通做,這馬看著有人客來,真正足歡喜。希望逐家來交關,嘛一定愛遵守防疫措施。

燒滾滾的米粉炒貢丸湯真唌人,新竹城隍廟外口賣食的擔仔,自5月3級警戒了後全數停業,2個外月無營業。真濟想欲食新竹名產的民眾,等了誠久。

民眾講,「(會使佇內底食感覺按怎),其實袂䆀,較好,因為紮轉去食,物件冷去氣味嘛攏無仝款。」也有民眾講,「疫情進前就想欲來,毋過因為疫情,所以就一直無法度來。」

城隍廟擔仔商管委會指出,目前是以單一出入口進行實聯制,嘛有要求擔仔商遵守防疫規定,賣食的業者講看著人客來真正足歡喜。

擔仔表示:「有生理做,有淡薄仔收入會較好,真歡喜,較穩定。」攤商講,「上少有營業,才會使趁錢。」

除了城隍廟,另外真受囡仔歡迎的新竹動物園,嘛重新開放,人數限制是控制上濟1500人,另外園區內袂使食物件,干焦會使啉水。

全台敬老金大調查

相關新聞