嘉義30人注過AZ.閣欲注莫德納 掛號總被退掉

目前武漢肺炎疫苗，猶未開放2筒注無仝品牌的。佇嘉義有30幾人已經注過AZ，閣去登記莫德納，好佳哉醫護人員有發現，這陣攏已經通知，嘛共in的掛號退掉矣。

全台灣這陣當咧拚新冠疫苗的注射率，嘛傳出AZ佮莫德那兩種疫苗前後注的效果會較好的講法，毋過政府猶未開放兩筒預防射注無仝品牌。這陣嘉義市煞傳出有人注過AZ閣欲登記來注莫德納。兩間辦理注疫苗的病院，透過資料比對，共總共30外位民眾擋落來。

陽明病院院長謝景祥講，「民眾先預約來掛號的時陣，阮會佇前一工暗時，共全部資料佮CDC的資料庫比對，阮大概發現有廿外位。」
聖馬爾定醫院區醫療部主任陳汶均表示，「第一改設站，阮發見3位民眾in有注過AZ，然後閣想欲來接種站注莫德納，第二批阮發見6位民眾，嘛仝款注過AZ閣想欲注莫德納的狀況。」

病院透過民眾預約，提早佮中央的資料做比對，一方面會當減少現場人員的工課，嘛會當避免想欲混合注疫苗的情況。病院表示，遮的人有的是袂記得，嘛有的是序細預約的，院方攏共解說目前無開放混合注疫苗，退in的掛號。

嘉義市衛生局副局長廖育瑋講，「民眾假使前後注兩種無仝的疫苗，若發生疫苗不良事件，嚴重的親像死亡，這會影響疫苗不良事件的賠償，會影響著家己的權益。」

嘉義市衛生局表示，嘉義市是採用預約的方式來注射，所以注射的時間佮疫苗，攏有完整的紀錄，目前中央既然無開放注無仝的疫苗，呼籲民眾愛加配合。