英國綠色觀察名單有臺灣 自7/19入境免隔離

根據英國公佈上新的旅遊警示名單,臺灣已經列入去安全名單內。上緊7/19,臺灣旅客去到英國就毋免隔離。英國是希望7/19就解除封鎖,毋過這2禮拜,確診的人數已經超過4萬人,是這半年來上懸的紀錄。

佇英國倫敦,車來來去去,大部份的人也攏無掛喙罨矣,英國首相強生拍算7月19解除封鎖,不過其實當局政府早佇5月中,就已經重新啟動國際旅行。

最近台灣的疫情有轉和,英國政府佇14公佈,上新的旅遊警示名單,台灣原本是黃色名單,這馬轉做綠色觀察名單,台灣旅客對7月19開始,入境英國就毋免隔離。」

這改仝款列佇綠色觀察名單的,除了台灣,猶有克羅埃西亞,香港和保加利亞是已經佇綠色名單內,根據英國政府規定,對綠色名單出發的旅客到當地,干焦需要有出發前2工內PCR陰性報告,免隔離檢疫,不過國內旅行社表示最近台灣飛歐洲的訂票率,並無增加。可樂旅遊總經理李季柏說明,「有來訂票的大部份攏是去美國或者是去中國,去歐洲的部份,這馬占比可能10%左右。」

英國註冊醫師葉庭瑜講,「英國的疫苗覆蓋率已經誠懸,所以就算伊解封,目前預估雖罔病例數會起去,毋過疫苗對蹛院和重症,是有誠好的壓制效果。」醫師表示英國疫苗涵蓋率已經欲七成矣,不過英國拚解封,14這工,就超過4萬人確診,49人死亡,創下這半年來孤一工上濟的紀錄。

相關新聞

專題|全台敬老金大調查