全國三級警戒，民眾無代誌攏袂出門，連觀光地區內灣老街內面的「內灣戲院」，也有風聲講，受著疫情衝擊欲收起來。
貨車來共餐廳閣會使用的物件載走，內灣出名的景點內灣戲院，是遊客來到遮一定會來翕相的所在，幾冬前因為時代改變改做餐廳，毋過這改受著疫情影響，頭家講逐個月攏佇燒錢，實在擋袂落去矣。
業者范德忠:「對疫情爆發以來，接到三級警戒了後，阮的營業額到目前為止攏是0，因為這是觀光區，完全無遊客，阮嘛無法度做外送，因為這無外送的廠商，所以阮是過了真辛苦，每個月的生活開銷參營運開銷，攏愛百外萬，無法度去補這个空。」
閣踅來內灣街仔，店頭大部份攏選擇歇睏，因為疫情的關係，這馬的內灣老街比起過去實在差真濟。
附近商家:「兩個月矣 一點仔收入攏無，紓困阮嘛提袂著。」
內灣商圈協會理事黃仕鈞:「疫情猶未結束，毋過已經聽著袂少店家佮擔仔商準備欲收擔，抑是欲轉移店面，抑是欲退租等等，當然主要真濟攏是租金的問題，這段時間對內灣疫情後復甦的路，其實是愈來愈遠。」
舊年疫情開始，各行業攏受真大的衝擊，誠無簡單才擋到今年希望狀況會使較好。想袂到疫情煞是愈來愈嚴重。這馬逐家只希望疫情趕緊轉和，生活才通恢復正常。
