買著異丙醇酒精是假? 藥師:通消毒.莫噴空喙

誠濟人看著超市、藥局抑是網路有賣酒精就直接買,煞無共成份看清楚。其實酒精的學名號做,乙醇。有的人去買著異丙醇,就感覺予人騙去。專家就講,異丙醇嘛是會當提來消毒,毋過上好莫噴著空喙。

市面上酒精,大部份的人可能袂去注意成份,這幾工面冊頂懸有藝人發現家己買著的酒精,面頂寫清潔酒精,毋過成份毋是乙醇,斟酌共看是異丙醇,叫是買著工業用酒精,感覺予騙去。
 
職業藥師鄭凱鴻:「in兩種其實攏長期當作消毒液使用,異丙醇確實伊的味佮刺激性會比乙醇較強淡薄仔,但是伊仝款是安全的,目前毋管是美國抑是台灣攏有發公文講,掠準乙醇欠貨的話,會當用異丙醇來代替。」
 
藥師表示,市面上的清潔酒精,頂懸貼紙若成份寫Ethanol是乙醇,若是寫isopropanol alcohol就是異丙醇,原則上,兩種就是這馬的防疫酒精,因為製造過程無經過殺菌,通常用佇環境消毒,欲用佇噴手其實也無問題,只是袂當參醫療用的酒精乙醇仝款,用佇醫療器材抑是直接用佇皮膚空喙的消毒。
 
職業藥師鄭凱鴻:「藥用的酒精是醫療咧使用的,伊是有醫藥字號的,毋過目前大部分攏送去病院,所以市面上會較僫揣著,藥用是會當直接噴佇皮膚(空喙)。」
 
經濟部中部辦公室也表示,目前酒精核准成份,有異丙醇、乙醇參丙醇,但照商標法,若商品成分寫異丙醇,標示就無應該寫75%的酒精,可能會予人誤會,另外標示除了英文也應該愛有中文字,這部份會閣輔導相關業者,也呼籲民眾欲買進前愛看詳細。

全台敬老金大調查

相關新聞