有"臺灣南丁格爾"的稱號 臺大設銅像紀念陳翠玉

人講,醫者爸母心。陳翠玉女士,佇國民政府來臺的時,共西方的護理教育經驗佮制度引入臺灣,提升臺灣病院佮護理教育的水準。十二是國際護師節,臺大護理學系,特別舉行陳翠玉女士的女性文化地標,掛牌儀式。

揭開花布,這是陳翠玉女士的銅像,背後南丁格爾攑燈的模樣。國際護師節這工,佇台大護理學館頭前,透過陳翠玉的女性文化地標,紀念這位台灣南丁格爾的奉獻。
 
地標設計藝術家王秀杞:「南丁格爾攑燈,是伊真代表性的畫面,所以就共護士的元素加起來,來創作這件地標。」
 
陳翠玉是台灣頭一位受過日本專門教育的護士,戰後嘛到加拿大佮美國,分別提著護理學士佮護理行政碩士,成做台灣護理界第一位到北美洲提著碩士的女性。

1945年,國民政府接收台灣,陳翠玉為著欲創立「衛生司」,予當時的官員當作是目內刺,差一點仔列入去228事件的銃決名單;1948年,陳翠玉引入西方的護理教育經驗,改革台大病院的制度;1950年,陳翠玉閣創辦台大護校,佇學校實行鼓勵學生獨立思考的美式教育。
 
台大醫學院院長倪衍玄:「因為佇過去台大醫學院的歷史上,陳翠玉校長的名是予抹烏的,是無存在的。」
 
陳翠玉落尾猶是受著羅織貪汙、瀆職的罪名免職,雖罔各界鬥相共,最後判無罪,但是伊感覺失望,決定離開台灣。佇海外推動女權、佮美國護照註記Formosa等等運動,予國民黨政府列入烏名單、袂當轉來台灣;落尾為著參加世界台灣人大會,佇新加坡提著簽證轉來台灣的時、煞破病不幸過身。
 
監察院院長陳菊:「伊佮世界衛生組織的接接,伊為著濟濟弱勢 落後地區,人民的健康、護理的奔波努力,但是佇彼个階段,真僫予當時的統治者接受。」
 
包括陳翠玉銅像在內,台灣這馬有12座女性文化地標,向望透過遮的地標設置,予逐家了解台灣女性的奮鬥佮奉獻。

相關新聞

專題|全台敬老金大調查