守護北臺灣"母親之河" 民間發起清淡水河糞埽 | 公視新聞網 PNN

守護北臺灣"母親之河" 民間發起清淡水河糞埽

母親節除了感謝咱每一位辛苦的媽媽,有民間團體佮台北藝術大學的學生,是發起抾糞埽的活動,欲守護北臺灣的母親河、淡水河。
 
無論大人囡仔,攏認真咧抾糞埽,天下雜誌和台北藝術大學做伙舉辦守護淡水河駁岸的活動,希望民眾對生活中了解河川廢棄物對環境的影響。
 
守護淡水河提計畫執行者Jimmy:「淡水河這馬生活糞埽足濟,伊的沉積物嘛足濟,所以變做講船嘛無法度行,落去嘛足臭的,攏是生活糞埽,變講無法度利用遮的水源。」

主辦單位表示,今仔日的淨河活動,有成百人參與,佇母親節這工,號召民眾用行動來關心北臺灣的母親河。
 
參與民眾郭銘蘭:「今仔日母親節,知影這个活動感覺足有意義的,就tshuā囡仔想講鬥陣來,而且我嘛蹛社仔附近,就感覺淡水河是自細漢就足有感情的。」

無偌久的時間,民眾就抾出幾若袋的糞埽,經過分類,未來學校嘛用會部份的廢棄物來做藝術創作。
 
北藝大美術系助理教授涂維政:「阮發起一个號做藝術嘉年華活動,也就是講抾遮的糞埽,但是會使變做藝術品這个概念,我有辦一个比賽,就是淨河遮的糞埽,會當做像若衫,抑無就是做藝術品。」

未來有幾若間大專院校的美術系、設計系學生會做伙合作,將部份抾來的糞埽,成做創作的元素,製作藝術品,六月初五佇海關碼頭展出,向望民眾透過生活佮藝術,理解廢棄物對地球造成的影響。

相關新聞

留言區