王光祿案 大法官:部份違憲.刑期袂使提出救濟

包含布農族的王光祿在內，有幾若个原住民，用鳥銃拍獵，去予法院判刑。因為檢察總長提起非常上訴，2017年，最高法院認為這个案件有違反憲法的疑慮，決定聲請釋憲。司法院大法官宣佈，部份條文違憲，毋過王光祿判刑的部份，無法度因為釋憲的結果，來提出救濟。


王光祿案佇初七公布釋憲結果，這个案的主要爭議，是限制原住民干焦會使使用家己製作、較危險的獵銃，佮法律對原住民拍保育類動物、需要事前申請等等限制，敢無違憲。大法官宣布，自製獵銃是無違憲，但是自製獵銃的安全問題，應該愛佇2年內改善。

動物保育的部分，大法官講，目前的事前報備制度，包括期限佮程序，無符合原住民文化，宣布失效，而且大法官講，原住民應該會使以自用的目的去拍獵，但是原則上無包括保育類動物。

針對這个結果，警政署回應，會佮國防部來研議，提供安全的零件組鳥銃。動物保育團體發聯合聲明講，動物是無法度家己講話的族群，開放特定的族群會使有拍獵的特別權利，應該愛斟酌，無是可能會對社會公共利益有影響。林務局佇記者發稿進前，猶未有回應。