促轉會按閣報延任1冬 楊翠:轉型正義袂當斷節

已經延過一擺的促轉會，今年五月份任期又閣得欲滿矣，毋過進前行政院長蘇貞昌有講伊支持促轉會繼續運作，今仔日促轉會嘛開記者會宣佈講，會閣向行政院報告，閣延一冬，主委楊翠表示，因為猶有一寡工課袂當斷節，紲落來的重點，會囥佇追究加害者的責任。

促轉會4/12開記者會，宣布原本佇五月底得欲屆滿的任期，會依照促轉條例的規定來展延一冬，主委楊翠講，延任的上主要原因就是轉型正義袂當中斷。

楊翠表示，現階段已經對受難者為中心，進入到國家不法佮體制的壓迫，未來會閣轉到以壓迫體制的責任歸屬為主，所以後續工作是欲貫徹追究責任、協力共進佮深化法治。也因為任務包括清除威權、推動法治等等，需要迒機關，所以獨立的二級機關是較適當的方式。

針對促轉會第二改延任，外界質疑促轉會若親像往過的萬年國會，楊翠表示袂直直展延。毋過民間真促會猶原發新聞稿批評，促轉會的一寡任務佇第一擺展延的時，就應該愛完成，對IN一延再延表達遺憾。