Xpark動物著傷.行為怪奇 動保團體促政府稽查 | 公視新聞網 PNN

Xpark動物著傷.行為怪奇 動保團體促政府稽查

佇桃園的水生公園X-park,進前捌予人發現,內面的動物著傷,而且閣一直做無意義的行為。動保團體經過半年的調查,今仔日召開記者會,指控X-park的設計對動物無夠友善,希望農委會介入,而且也愛檢討動物展演、管理辦法。

豹紋魴魚的尾溜予別隻魚仔食去,這是動保團體佇桃園的水生公園xpark翕著的畫面。動保團體今仔日開記者會,講經過半年的調查,發現Xpark館內的設計對收容的動物無講蓋友善,害in無法度展現出自本的癖性。

針對遮的狀況,動保團體要求政府著愛取締xpark、而且要求改善,嘛應該改善動物展演場所的制度佮稽查機制。農委會是回應,若確定xpark有違反法律,會請桃園市政府依法辦理;針對動物展演場所,已經有法律來規範佮稽查,未來嘛會繼續檢討法律佮執行的狀況

Xpark下晡發聲明回應,講動物的福祉是上重要的,面對外界的聲音,會虛心接受。in嘛強調家己受政府監督佮指導,是合法的動物展演場所,每個月攏有接受稽查。
 

相關新聞

留言區