迪化年貨街因疫情取消封街.試食 攤商想步銷商品

臺北大稻埕的迪化街，今年因為疫情的關係取消封街排擔仔，店頭也反映講生理減欲兩成，有頭家共本底試食的成本，優待予人客，價數算較俗咧。也有店家共利純較好的商品排頭前，希望就是加趁寡錢。

欲倚過年的迪化街，看過去人算閣袂少，雖然佮較早人滿四山的盛況袂當比，毋過顛倒有民眾感覺按呢踅街加較輕鬆。

受肺炎疫情影響，市府規定大馬路袂使排擔仔予民眾試食，真濟往過散裝的四秀仔，也改用一包一包裝起來。有賣海產乾料的店頭就講，今年生意佮往過比，減有兩成左右，為欲予商品較有銷，有的店頭調整陳列的方式，將人客較會買的物件，囥愈倚門口第一排，也有頭家降價，希望吸引閣較濟人交關。

有的店頭也配合網路行銷，欲趁錢逐家攏有撇步。迪化商圈也表示，這馬欲倚二九暝，買氣有比前一站仔好，也希望最後這幾工閣會使衝買氣，民眾買了歡喜，in也好過年。