嘉義市擋瘦肉精豬 堅持零檢出.嚴查學校午餐

嘉義市政府今仔日去到學校檢查營養午餐的食材,而且要求嘉義市內的學校攏愛嚴格執行,阻擋有摻瘦肉精的肉品食材進入校園。

中晝頓的菜車駛入來學校,每一項食材攏要經過檢查佮確認。嘉義市政府佇連紲假期結束,學校上課的第一工,宣布欲對市內所有學校的食材,做嚴格的來源管理。

行政院進前針對摻瘦肉精豬肉的標準有宣布。地方政府若有定地方的食安自治條例要求零檢出,因為違憲違法,是無效的。進前有定零檢出自治條例的嘉義市政府表示,佇12/31暗時確實有收著公文,毋過in會配合議會,進行申請釋憲的工課。

市政府配合業者佮學校全面阻擋有摻瘦肉精的豬肉,除了推動檢查的政策,嘛全面減少使用加工肉類的產品,有家長就表示,對國家到地方攏有相關的政策,但是消費者的配合才是主要的關鍵。

美國豬肉一月正式開放進口,嘉義市政府佮中央對瘦肉精的要求到今猶是無仝調。市府除了繼續要求在地業者配合零檢出的政策,也希望透過學校檢查食材的制度,予市內學生家長放心。

全台敬老金大調查

相關新聞