港人來臺求庇護 台權會主張定難民法遵照 - 公視新聞網

港人來臺求庇護 台權會主張定難民法遵照

有五个參加反送中運動的香港少年人來臺灣走揣庇護,因為目前進度外界無法度了解,最近引發真大的爭議。蔡政府自反送中爆發到今,就強調港澳條例有夠力,免閣設難民法;毋過台灣人權促進會批評港澳條例,無法律依據,應該愛參考國外的案例設難民法。毋過銅鑼灣冊店的店長林榮基認為,現有的條例其實保持一寡空間,對香港人比較較有利。

臺灣媒體工作者鐘聖雄9/13佇面冊煏講,有5个抗議香港反送中的少年人,來臺灣尋求庇護,對今年7/18逃難來臺灣,經過東沙島北的時,被陸委會扣留到今,兩個外月,猶無管道和厝內的人接接,形容in的狀況比難民猶閣較慘。總統蔡英文過去就表態講臺灣無需要難民法,強調港澳條例就有法度專案處理。不過台灣人權促進會秘書長施逸翔認為愛有法律的依據,才有法度真正保護香港人。

銅鑼灣冊店的店長林榮基認為,等若疫情較歇,需要尋求庇護的香港人,會閣較濟,伊認為蔡英文總統現有對香港人的人道救援關懷方案,保留伸勼的空間,對香港人其實有利。

這陣疫情猶袂完全擋恬,香港的政治和經濟,閣因為國安法受著袂少影響,面對不安的社會趨勢,香港人欲何去何從,臺灣又閣會當出偌濟力,也是執政黨眼前的一大挑戰。

相關新聞

留言區