注心創作臺語文學 陳明仁寫出臺灣拋荒的故事

作家陳明仁，專門科是讀文學佮戲劇，少年時捌寫過電影劇本，尾手主編黨外雜誌、扞選舉文宣，漸漸才覺醒講，只有用台灣話來寫詩、寫小說，才會當保護咱的文化，寶貴的主體性。今前衛出版社嘛將陳明仁《拋荒的故事》這部作品，配合錄音落去發行，望予較濟人聽--著、讀著故事中間，台灣的精神。

用正港的臺語氣口來讀家己的小說，陳明仁展現出這幾十年來的臺語底蒂。伊講，伊就是欲共臺灣人往過的故事攏寫出來。

陳明仁表示，語就是有聲音的，愛寫臺灣人讀有嘛聽有的作品，才通成做伊心目中的臺語文學。這款的理念，連前衛出版社的社長林文欽也真認同，和伊長期合作。

社長林文欽褒嗦陳明仁有語言的天份，臺語講著也真媠氣，聽伊的冊誠實會使感受著文學的氣味，閣會使對冊內底抾一寡傳統的臺語詞轉來。

長久以來，除了臺語文的創作，陳明仁猶有一个囥佇心肝底的夢想。

身為臺灣人，喙講臺灣話、手寫臺語文是陳明仁一生拍拚、奮鬥的目標，伊也希望這寡伊寫的冊，未來通成做臺語文教材，予少年人了解臺語原仔有才調通寫萬事萬物。