許家古厝欲拆 保留花磚記錄臺灣傳統文化

台灣花磚博物館的師傅提電動鏨仔咧拍壁，毋但下手的動作愛緊猛，閣愛隨時注意花磚的狀況，因為高雄林園這棟許家古厝，正身壁堵頂懸妝娗的花磚攏已經有百年歷史，館方講，古厝壁堵的紅毛塗有三十公分厚，欲按怎共花磚圖完整提落來，誠實考驗師傅的技術。

台灣花磚博物館長 徐嘉彬：「這（工課）袂使著急，所以愛足細膩、足細膩，若是震動傷大的時陣，花磚就會必開。」

林園許家古厝佇八月傳出土地轉賣，新地主欲共古厝規棟攄掉起店面，彼當陣都有民眾喝聲，向望會當保存壁堵的珍貴花磚。有議員接著消息去佮地主協調，同時揣來花磚博物館鬥相工，用三工的時間，才共頂懸的八幅花磚圖完整保留落來。館方表示，無論是忠孝節義的故事，抑是孔雀、牡丹的花草，攏是一百年前臺灣藝師一筆一筆手工畫出來的，親像這款的花磚圖，就連伊的博物館這陣嘛干焦幾十幅爾，相當的珍貴。

台灣花磚博物館長 徐嘉彬：「就親像廟宇的門神仝款，攏是干焦1幅的存在，所以阮就想共伊保存落來。因為高陽堂的花磚，其實無徛名講是啥人畫的，毋過伊的工筆是非常媠的，所以有可能是，有專家講遮是洪華畫的。」

高雄市議員 邱于軒：「感謝博物館隨佮阮進行橫向的聯絡，派師傅落來，用非常精密的技術去切割，共遮的往過林園的風華保留落來。」

雖罔百年古厝留袂牢，毋過佳哉猶有這寡花磚圖會當𤆬咱見證臺灣傳統社會佮文化的媠。館方表示，修復工作大約愛一冬，除了共紅毛塗黜予清氣，閣愛浸藥水洗ba̋i-khín，到時修復好勢，就會囥佇館內公開展覽。

記者 許嘉茹 邱紹揚 高雄報導