每降1℃心梗窒風險加2.6% 三高患者愛注意

拜一各地攏是出日的好天，毋過暗時開始就欲變天矣，氣象署提醒，未來會有兩波東北季風影響臺灣，第一波影響到拜五，上寒的時間佇拜二暗到拜三，各地溫度大約14度-18度，閣來第二波就是禮拜、溫度會閣較降。氣象署提醒，最近溫度會起起落落，民眾短衫毋免完全收起來。

氣象署預報員 朱美霖：「佇北臺灣遮的話，有當時仔日時是感覺較溫暖的天氣；毋過佇東北季風影響的期間，日時氣溫回升無明顯。講著佇中南部這箍圍仔的話，日時的高溫猶是會當來到25度以上，其實感受上是較溫暖的；早暗的部份各地攏會下降，來到20度甚至是15度。」

有心臟科醫生提醒，最近透早透暗溫度真低，日時暗時溫差真大，這款變化也會予心梗窒機率大大增加，根據國內研究指出，若是溫度每降一度，心梗窒蹛院的比率就會增加2.6%，尤其是高血糖、高血油、高血壓、有三懸的序大是高危險族群。

臺北萬芳醫院心血管醫生 林永國：「天氣寒的時陣，食的較油較重鹹，所以這種時陣血壓較僫控制；阮若血壓控制無好，定定講心臟一寡問題就會走出來。」

醫生也表示，天氣變化大的時也愛斟酌身體變化，若出現心臟痛、喘氣困難、流凊汗、疲勞的情形，可能是心梗窒，若症頭超過10分鐘，就愛隨叫救護車。

臺北醫學大學附醫心臟科醫生 徐千彝：「天氣寒的時陣，會出現心慒心臟疼的症頭，這寡症頭可能會有一寡交感神經激活的表現，包括流凊汗、包括輻射痛，疼到喙下斗、肩胛頭，這攏可能是咧欲（發生）心梗窒的現象。」

醫生也提醒，天氣寒序大浸溫泉，毋通浸超過30分鐘，心臟的負擔較袂遐大。另外，流感預防射也著愛趕緊去注，避免會著流感變重症。

記者 鄭亞宣 謝季潾 臺北報導