東北季風變強溫度降低 拜三北部上寒賰15度
加入公視會員，
按讚收藏你關注的報導
發布時間：
更新時間：
今仔日開始，是反冷了後、上強的冷空氣會影響台灣，北部、東北部、東部，會轉做烏陰落雨的天氣，溫度也會降真濟，東北季風的食風面，大台北地區、宜蘭會落大雨。冷空氣會佇拜三上強，北部、東北部，可能賰15度，中南部也只有17、18度，因為真溼，會感覺較冷寡，要等到拜六溫度才會回溫。（新聞標題、導言及內文皆為台語文）
拜六禮拜的好天已經結束，氣象署提醒天氣咧欲變寒，拜一過晝了後、東北季風會開始增強，愈暗會愈寒，除了溫度會下降，食風面的大臺北和宜蘭、部分地區有可能會落大雨，抑若中南部的天氣猶是以濟雲好天為主。
氣象署預報員 葉致均：「基隆北海岸，宜蘭地區和大臺北山區會出現落大雨的情形，拜一、拜二兩工，北臺灣地區的民眾愛特別注意，會記得紮雨傘，到拜三以後水氣開始會漸漸仔減少。」
溫度的部份，氣象署表示，這波東北季風會一直影響到這个拜五，愛到拜六禮拜天氣才會開始變好，受冷空氣影響，全臺灣這禮拜攏會降溫，尤其拜三拜四會是溫度下降上明顯的兩工，北部地區佮宜蘭透早只有15度左右。
氣象署預報員 葉致均：「拜三和拜四透早會是這波冷空氣上強的時間，預計中部以北 宜蘭低溫會佇15度至17度左右，其他所在會佇18度至19度，溫度佮前幾工比是有明顯變冷的情況。」
氣象署提醒，這幾工北部和宜蘭的民眾，出門就愛記得紮雨傘，各地愛注意天氣變化，早暗溫差大，海邊仔的風會較透、海湧也會較大。
記者 陳心彤 謝季潾 臺北報導
鄭宇汘/編輯
