東北風增強+「鳳凰」倚近 全臺禮拜反冷落雨

初七是立冬，俗語講立冬補冬，咱也慣勢食羊肉爐、薑母鴨補喙空，毋過今年的立冬毋若袂冷，天氣閣真好，毋過氣象署表示咧欲反天囉，因為東北季風增強，閣加上風颱鳳凰當咧倚近臺灣，氣象署講風颱強度會閣變強，禮拜接近菲律賓的時，真有可能會是強度風颱。

中央氣象署技正 林秉煜：「未來繼續向西行，強度會閣增強變成強度風颱，但是行過菲律賓會受著地形破壞，所以伊就會對強度風颱減弱，變中度風颱。當然有可能伊佇出海的時陣，伊的強度受著地形因素無去，強度會閣增加一寡仔，毋過增強的程度是有限，因為伊未來向北行的過程，會受著北爿東北季風影響。」

雨水的部份，氣象署表示，對禮拜開始一直到後禮拜三各地會落雨，嘛會反冷，尤其是大臺北地區和東半部地區，受著東北季風和風颱外圍環流的影響，會摔大水雨，另外中南部地區的雨水，愛閣觀察風颱的路線才有通評估。

中央氣象署技正 林秉煜：「綴風颱的路線會有真懸的相關，規个來看目前的預估，東半部地區猶有花東地區，未來的落雨佇後禮拜二、拜三，猶是愛注意可能會有大雨，抑是部份地區落大水雨的情況；南部地區綴風颱接近的程度，也愛注意佇後禮拜三的時陣，會有部份地區落大雨、大水雨的情形。」

氣象署提醒，禮拜和後禮拜一沿海地區和外島，有可能會摔大水雨，風嘛真透，可能搧9級至10級的強陣風，猶閣會有三米懸的海湧，提醒民眾著愛特別注意安全。

記者 陳心彤 莊浚佑 臺北報導