屏東禁載外縣市潘 業者硬欲載、2人裁定交保

環保局員工 vs. 廚餘業者：「我有我的工課愛做，袂使得啦。」

環保局員工佮載潘的業者兩人搝搝搦搦，後壁閣綴一台載潘的車，員工按怎擋就擋無法，只好報警處理。環保局講，落車掰會佮駛車載潘的人，是萬丹鄉一搭畜牧場業者，進前載超量閣偷濫外縣市的潘來倒予人發現，已經禁止怹閣來，想袂到10/28中晝，業者激皮皮，照常載兩車過來硬欲倒。

屏東縣環保局廢管科長 伍展沛：「佇咧阮禁止伊進廠了後，伊10/28猶是硬欲入來阮的廠區倒潘，嘛有妨礙公務的情形，阮已經請警察單位協助做筆錄，而且移送地檢署偵辦。」

警方到場，除了當場查扣車輛以外，嘛共兩人移送地檢署偵辦。屏東地檢署透暝偵訊，按照違反廢清法、妨害自由、妨害公務等罪嫌，向法院申請羈押。抑法院10/29裁定，姓施的業者佮駛車姓林的司機，兩人分別以9萬箍佮2萬箍交保。記者敲電話予業者想欲了解代誌發生的過程，業者表示，無方便講啥。

廚餘業者：「這馬交予警方咧處理矣，多謝。」

屏東地方法院刑事庭庭長 鍾佩真：「被告兩人的犯罪手路是，共廢棄物送去崁頂焚化廠處理，毋是倒佇咧其他違法的所在，閣加上考慮著豬災期間，政策變動的特殊性，（兩人）分別以新臺票9萬箍佮
2萬箍交保。」

環保局表示，因為非洲豬災的代誌，屏東縣嚴格管制潘的載運佮處理，業者處理潘有合法資格，逐個月的量是72噸，毋過最近干焦這四工就載超過87噸來倒，已經違法，除了會追究刑事責任以外，也會直接取消業者處理潘的合法資格。

記者 許猛㨗 許嘉茹 邱紹揚 屏東報導