最近宜蘭有縣議員提案，希望設立台語實驗小學，毋過宜蘭縣府以公辦民營實驗學校名額已經滿額的理由，表示無法度閣加設台語小學。在地的台語共學團家長表示，就算講無法度辦台語學校，縣府嘛應當規畫符合宜蘭腔的台語教材，避免予主流腔濫去。教育處是回應講，怹會來研究和規畫。（新聞標題、導言及內文皆為台語文）
臺灣各地攏有一寡特殊的地方腔，比論宜蘭腔的滷卵會讀做「lóo-nuī」，酸酸軟軟會講「suinn-suinn-nuí-nuí」。最近宜蘭也有縣議員提案，希望設立台語實驗小學，毋過宜蘭縣府以公辦民營實驗學校名額已經滿額的理由，表示無法度閣加設台語小學。在地的台語共學團認為，就算講無法度辦台語學校，縣府嘛應當規畫符合宜蘭腔、宜蘭人文的台語教材，維護宜蘭的特色。
宜蘭台語親子共學團創辦人 張芷瑜：「若是教材攏統一攏仝款，用台語的教材，可能無法度共阮這个宜蘭腔的特色囥入去，所以阮的地方的囡仔，可能對宜蘭腔就無遮熟似。」
宜蘭台語親子共學團家長 蔡靜儀：「我足希望咱有宜蘭腔的教材，這个宜蘭腔真正是愛好好仔保存，這是足傳統的物件，所以真正真正有希望，宜蘭腔的教材會當繼續傳落去。」
提案希望宜蘭縣府推動成立台語實驗小學的議員謝燦輝，對開發宜蘭台語教材的議題嘛表示支持，根據國家語言發展法，伊認為縣市主管機關，有這个義務愛來規畫。
宜蘭縣議員 謝燦輝：「絕對怹是主管機關嘛，所以怹有權利來做這个工課。宜蘭腔是上珍貴的，如果這無延續落去，後改無宜蘭腔矣啦，後改攏講中文矣。」
宜蘭縣教育處是回應講，針對適合宜蘭學生囡仔的台語教材，會閣來研究、規畫看覓。
宜蘭縣教育處代理處長 陳金奇：「語言這部份就是愛共保留起來，另外就是來推廣，像咱宜蘭腔有阮宜蘭腔的特色，這部份阮會來研究看覓。」
另外，議員謝燦輝嘛要求縣府若準無法度辦台語小學，也應當先對專班試辦，教育處是回應講，目前主要猶是以原底的台語教學計畫和沉浸式台灣台語計畫落去做，嘛有定期去校學了解輔導台語教學的情形，教育處表示，已經盡力落實台語生活化，目前無設立專班的拍算。
記者 呂尚儒 莊浚佑 宜蘭報導