為著欲唌民眾了解古蹟，文化部和《文訊》雜誌合作，邀請12位作家，發揮想像，用散文、報導和小說的方式，來書寫國內16搭古蹟。包括霧峰林家、板橋林家花園、竹仔門電廠、臺北公會堂等等，文化部也希望改變逐家感覺古蹟的紹介，攏是柴柴、古板的印象。（新聞標題、導言及內文皆為台語文）
巴洛克風格的洋樓，佇高雄美濃山區，這是1908年日本時代起的發電廠，號叫竹仔門電廠，也是臺灣第一座產業古蹟。
文學家謝鑫佑參觀電廠的時，發現三个墓，其中一个墓的主人是日本人山中三雄先生，伊佇1937年因為清理水池，不幸跋落水殉職。謝鑫佑就提伊做故事男主角來寫小說，寫伊和臺灣查某囡仔的愛情故事。
作家 謝鑫佑：「伊是清理水池的時陣不幸罹難的，後來我就共伊發展做一个故事。彼當陣真濟的客人、日本人、閩南人，逐家之間有姻親關係，我就共這个小說發展做，是日本人佮臺灣女性（故事），一个閩南人一个客家人之間的關係。
毋但竹仔門電廠，有浪漫的愛情故事，臺灣其他的古蹟，新像臺灣總督府博物館、臺北公會堂、霧峰林家等16个所在的古蹟，也攏有屬於家己的故事。這是文化部和文訊雜誌社，共同出版的國定古蹟專刊，和一般古板的古蹟介紹無仝，文化部揣12位文學家來書寫，以散文、報導、小說的方式來呈現。
文化部文化資產局局長 陳濟民：「怹遮的文學家，怹愛先了解古蹟的歷史，了後愛閣行入去古蹟內底，來共怹的感受佮怹對古蹟的想像，共寫出來。」
文化部表示，目前全臺攏總有112搭古蹟，計畫出版6本文學作品，希望透過書寫，來增加逐家想欲熟似古蹟的興趣。
記者 鄭亞宣 林郁凱 臺北報導