唐美雲年度大戲《夢在海潮那邊》，演清朝海賊-蔡牽媽的故事，透過女性的角度，看見愛情、婚姻閣有事業的起落。這改由唐美雲、唐文華、許秀年、小咪，四人仝台演出，咱做伙來看四人，膏膏纏的愛情故事。（新聞標題、導言及內文皆為台語文）
「須待今暝人睏靜。」
眼神曖昧，後一秒兩人手牽手去談戀愛，演出一段婚外情。這是唐美雲歌仔戲團的新作品《夢在海潮那邊》，這改唐美雲毋是演小生、改演小旦，伊演的是清朝海賊蔡牽的牽手，毋過煞去愛著歌仔戲演員小咪演的生理人李啟明。
歌仔戲演員 唐美雲：「（蔡牽媽）伊嫁予蔡牽了後，其實伊毋是干焦做某爾，伊是伊的軍師，伊替伊規畫海上企業的版圖，所以伊是一个賢內助。雖然伊的個性有較浪漫一點仔，所以上岸了後，就去拄著小咪老師（李啟明）。」
歌仔戲演員 小咪：「（蔡牽媽）伊是一个真浪漫的查某人，來見著我這个斯文人，就激足斯文的；佇怹翁彼爿就無仝款矣，就派頭較查埔個性。」
「半生海上咧奮鬥。」
這改演唐美雲翁婿的是京戲老生唐文華，這是怹第四改合作，伊講對京戲跨領域來演歌仔戲，需要做真濟功課，佳哉現場每一位演員，攏是伊的台語老師，伊也學了真緊。
京戲老生 唐文華：「我的老師足濟的，去做工課斟酌看斟酌聽，老師共我教，佗一个字，喙愛合起來。」
「瓊花一暝，一暝夢裡開。」
做伙演戲的閣有許秀年，演一位勥跤的客棧頭家娘。四位實力派演員仝台演出。唐美雲講《夢在海潮那邊》是一个接近歷史、全新打造的故事，邀請觀眾做伙來看戲。
記者 鄭亞宣 林郁凱 臺北報導