十月份中秋節連鞭到，臺南麻豆文旦最近差不多攏已經採收矣，就是因為進前丹娜絲風颱，造成麻豆文旦大量落果，產量干焦賰兩成，今年是閣較搶市，毋過猶是有誠濟果農堅持無欲起價，欲佮老顧客維持這份感情。（新聞標題、導言及內文皆為台語文）
在地種文旦超過50冬的老果園，就算不幸拄著風災，產量減少，毋過今年抑是無起價。規个麻豆地區，產量干焦賰兩成，照理講產量少會變較貴，種麻豆文旦農民今年顛倒因為感情因素，共價數壓落來選擇照原價。
麻豆果農 陳哲雄：「風颱來，對中部、北部、南部、東部（人客）攏來關心，這種感情用金錢是袂當補的；第二點我是感覺講，我若無第一聲壓落去，彼个價數就起來矣，這个農業的社會責任是一定愛負起啦。」
這陣這文旦市場有影真搶市，像另外一間捌得著三改臺南文旦評鑑冠軍的果園，業者仝款主動佮老顧客參詳，希望逐家減量買，予別人今年嘛會使食著文旦的好滋味。
麻豆果農 郭李春梅：「袂使講規个攏予仝一个人，其他的就無法度分配，所以阮愛提早愛因應，電話嘛是一直咧敲；毋過就真正無矣，就是因為風颱的關係。」
民眾：「頭家娘對我真好，仝款是按呢的數量予我。（今年會感覺閣真感恩？）著著著。」
目前麻豆文旦大部份採收矣，人客訂的陸續咧出貨，農會表示，今年穩定價數的策略，嘛是希望維持麻豆文旦的品牌價值。
麻豆農會推廣部主任 李坤益：「咱這个農友的反應是攏無欲起價，因為攏是舊的消費者，所以攏維持予消費者一个上好的物件、維持公平的價數。」
雖然今年風災來擾亂，佳哉這陣賰的麻豆文旦，口感風味攏仝款真芳甜。
記者 李晨宇 臺南報導